最新QS世界大學排名終於出爐啦！到底邊間韓國大學成功入圍500名內？
Hello，大家好，我哋係由韓國人每日提供最新韓國旅行資訊嘅Creatrip。
無論係語學堂定讀大學，相信有唔少朋友都有諗過嚟韓國留學！揀學校嘅時候除咗有咩科揀、地理位置、未來發展方向等等之外，好多人都會睇埋學校排名（因為會影響搵工同搞簽證）！今日小編就幫大家整理咗新鮮出爐嘅「2026 QS世界大學排名」500名以內嘅韓國大學，大家不妨可以參考！
2026 QS世界大學排名500強
首先等小編介紹吓「QS世界大學排名」先啦！呢個排名由國際高等教育研究機構Quacquarelli Symonds根據學術聲譽、收生國際化程度等等嘅指標評價全球各個國家同地區嘅大學，可以話係最有權威性嘅大學排名。一齊睇吓今年有邊幾間韓國大學入選500名內啦！
上年排名：第31名
就好似香港有港大、中大、科大呢3大龍頭咁，韓國TOP3大學學府分別係首爾大學（S）、高麗大學（K）、延世大學（Y），簡稱SKY，當中「首爾大學」一直被視為係韓國最好嘅大學！不過今年QS排名跌咗，但仍然成功衛冕韓國大學冠軍寶座！
上年排名：第56名
好似頭先所講，「延世大學」係韓國三大學府之一，喺首爾就有三個校區，當中相信有唔少朋友都有去過新村校區同Main Building合照打卡！「延世大學」總共有19個Faculty，亦都有唔少外國人會嚟讀語學堂，甚至係攻讀碩士或者博士~ 今年排名再升咗6位，係有史以嚟最佳成績！
上年排名：第67名
韓國大學三大龍頭之一「高麗大學」今次成為咗韓國大學之中嘅第4名，呢間學校創建於1905年，係韓國歷史最悠久嘅大學之一！紅色嘅校徽同老虎可以話係「高麗大學」嘅象徵，同頭先介紹嘅「延世大學」嘅藍色校徽形成對比。應該有好多有關注韓國嘅朋友都知道，高麗大學同延世大學可以話係死對頭，由以前開始一直都不斷競爭！大家又鍾意邊間多啲呢？
上年排名：第98名
接住落嚟就跳到第102名嘅「浦項工科大學」啦！比起傳統學府，而家科研同工科大學相對上喺可持續性同就業情況方面比較吃香，而「浦項工科大學」係韓國第一間研究導向型大學，可以話係韓國工科實力最好嘅大學之一！
上年排名：第123名
「成均館大學」係一間私立研究型綜合大學，係韓國歷史上最悠久嘅大學，創校歷史可以追溯到1398年，連宋仲基同車銀優都係呢度嘅校友！對遊客嚟講，呢度最出名嘅應該係明倫堂同超大棵嘅銀杏樹，不過對學生嚟講，學校條奪命斜真係好攞命！（不過學校都有提供穿梭巴士，大家唔需要太擔心日日要爬山XD）
上年排名：第162名
「漢陽大學」創建於1939年，係一間喺理工大學嘅基礎上發展而成嘅私立綜合型大學，好多人都會嚟呢度做交換學生！呢度嘅工學院同建築學院都係韓國公認最TOP嘅學系，聲譽非常好！
上年排名：第280名
同KAIST一樣，「國立蔚山科學技術研究院（UNIST）」係韓國四大致力於科技研究嘅公立大學之一！本身蔚山呢個城市被譽為韓國工業之都，汽車、造船業、石化能源同二次電池產業都非常出名，但係就冇可以培育人才嘅大學，所以韓國政府就決定創辦UNIST呢間學校啦！
上年排名：第328名
今次排第331名嘅大學係眾所皆知嘅「慶熙大學」！今年雖然整體排名跌咗少少，但係齋睇韓國大學嘅話其實排名高咗！「慶熙大學」係韓國三大私立名校之一，總共有20幾個系，亦都有好多人會嚟exchange~ 呢度除咗學術方面夠出眾，位於回基嘅校區亦都係首爾其中一個最靚嘅大學校園，每逢櫻花季就會有超多人慕名而來參觀同影相打卡，唔知大家又有冇嚟過呢？
上年排名：第326名
韓國嘅理工大學呢幾年都發展迅速，而大邱慶北科學技術院就係一間由研究機構轉型為公立理工大學嘅教育機構，前年第一次入圍500強，今年雖然排名跌咗，但仍然維持佳績！
上年排名：第359名
「光州科學技術院（GIST）」喺1993年建立，以高級科學技術人才培養為創校目的。呢度所有堂都係用英文上，碩士同博士論文都係用英文寫，同其他韓國大學好唔同！
上年排名：第396名
「世宗大學」位於首爾廣津區，喺1940年創辦，以韓國偉人世宗大王為名。大家可能比較少聽到呢個名，不過原來GD、宋慧喬、柳演錫等韓星都係呢度嘅校友！呢度都有語學堂，如果想學韓文都可以嚟呢度~
上年排名：第524名
今次入圍世界大學500大嘅新面孔係釜山大學！呢間大學1946創立，更加係韓國光復之後第一間創辦嘅綜合國立大學，更加被韓國政府為優秀認可大學，教學質素有保證。而且附近就有海雲台、廣安里等附近幾個海灘，推薦大家可以考慮都佢哋嘅語學堂，體驗釜山留學生活！
上年排名：第489名
「中央大學」以戲劇系、電影系同攝影系最負盛名，最近好紅嘅李到晛、金旻載、朴信惠等等韓星都曾經喺度返過學，話唔定你都可以同明星做到同學一齊做projectXD